Eskola kirol egokitu eta inklusiboa

Eskola Kirol Egokituko Programa (EKE) desgaitasuna duten eskola- umeei zuzenduriko programa bat da (6 - 20 urte), kirol praktikarako aukera bermatu nahi diena. Eskola- ume hauek, beraien ezaugarriak direla medio, eskubidez praktikatzea dagokien eskola kiroleko programatik kanpo gelditzen dira maiz, beraien ikastetxe edota beraien bizilekutik gertuen dituzten kirol elkarte nahiz kirol zerbitzuek dibertsitate funtzionalari arreta emateko garaian dituzten gabeziak direla eta.

Egitasmo hau aurrera eraman ahal izateko, Gipuzkoako Kirol Egokituen Federazioak programa egituratu, gainbegiratu eta ebaluatzeko aditu talde bat kontratatzen du, Gipuzkoako Foru Aldundiko Kirol Zerbitzuak federazioaren esku uzten baitu esparru hau garatzeko funtzioa. 

GKEFk 15 urte daramatza programa hau aurrera eramaten eta azken helburua, desgaitasuna duen pertsona orok kirol praktika bere ingurune naturalean egin ahal izatea da, horretarako, udaletxe ezberdinekin hitzarmenak adostea ezinbestekoa delarik.

Gipuzkoako Eskola Kirol Egokituko programa eskualdeka antolatzen da, eskualde bakoitzean dagoen erabiltzaile kopurua, hauen bizilekua eta partehartzaileen ezaugarri nahiz adina kontutan hartuz talde ezberdinak eratu eta ikasturte guztirako programazioa egituratzen delarik.

Talde bakoitzak astean zehar gutxienez bi saio egiten ditu, bata aretoan eta bestea igerilekuan. Ikasturtean zehar, gainera, zenbait asteburutan partehartze irekia izaten duten jarduera ezberdinak eskeintzen zaizkie, jarduera hauek elkarte ezberdinekin elkarlanean antolatzen ditugularik:  futbol egokituko topaketak, denontzako mendi irteerak, surf inklusiboko jardunaldiak, sentsibilizazio jardunaldiak,…

Gaur egun GKEF-k, Gipuzkoako Foru Aldundiaren gidaritzapean egituratzen duen Eskola Kirol Egokituko Sarea 7 eskualdetan dago aktibo: Donostialdea, Bidasoa, Oarsoaldea, Urola Kosta, Goierri, Urola Garaia eta Tolosaldea.

Debagoienan, orain arte GKEF arduratu izan da desgaitasuna duten gazteekin osatutako zenbait talderen kudeaketaz, baina aurten, GFA-ak talde hauek bertako eskola kiroleko egituran txertatzeko egin duen apustua dela eta, bertako kirol agenteek hartu dute taldeen kudeaketa ardura, GKEF-k agente hauei aholkularitza eta laguntza ematen dielarik inklusio prozesuan zehar.

Eskola Kirol Inklusiboko Programa (EKI) 2018an zehar GKEF eta GFAren eskutik martxan jarritako egitasmo pilotu bat da, desgaitasuna duten zenbait gazte beraien ikastetxeetako Eskola Kiroleko programan integratzeko helburua duena, beti ere, inklusio prozesu egokiak bermatuz eta horretarako zenbait baliabide eskuragarri izango direla  kontutan hartuta (giza baliabideak edota baliabide teknikoak).

2018 urtean zehar Gipuzkoako 21 ikastetxeren inguruan ikerketa bat egin ostean, 2019 urtean zehar, EKI gida lantzen aritu gara atal ezberdinak jorratuz. Batez ere, gida idazten aritu gara eta 2020 urtean argitaratuko delarik.

Helburuak

  • Gipuzkoako eskualde guztietan eskola kirolean parte hartzeko aukera erraztea.
  • Urritasuna duten gazteek eta familiek kirolean parte hartzeko geroz eta eskari gehiagori erantzuna ematea.
  • Taldeko beharrei egokitutako jarduerak zuzenduz, gizarteratzea eta talde harremanak sustatzea.
  • Haur eta gazteen osasuna eta bizi kalitatea hobetzeko, psikomotrizitatea, oinarrizko abilezia motoreak eta gaitasun fisikoa lantzeko gaitasunak hobetzea.
  • Osasuneko ohiturak eta jarduera fisikoarekiko atxikimendua lantzea.
  • Autoestimua, segurtasuna eta familien konfiantza hobetzea.

Kirol praktika aukera pertsona guztientzako landuz, kirolaren ikuspegia barneratzaileagoa eta atseginagoa izan dadin.

Antolakuntza

Eskola Kirol Egokituko hastapeneko saioak astean bi izaten dira, saio bakoitza ordu betekoa izanik. Programa honek, Kirol Egokituko profesionalak eta beharrezko apoioak ditu haur eta gazteen segurtasuna eta osasuna bermatzeko.

GIPUZKOAko kirol egokituko hastapen sarea. (Donostialdea, Bidasoa, Oarsoaldea, Urola Kosta, Buruntzaldea, Goierri, Urola Garaia, Tolosaldea).

ESKOLA KIROLEKO TALDEKO KOPURUA:
TALDE FINKOAK: 23
Image

Dokumentazioa

Kirol eskolari buruz dokumentazio guztia aurkitu ahal izango duzu hemen.

Galeria

© 2021 GKEF-FGDA